1
Zweymal ist jetzund gleich der schöne Früling kommen/
2
Vnd zweymal hat der Frost deß Winters abgenommen
3
Der Bäwme grünes Kleyd/ als Venus zu mir kam/
4
Vnd mich/ Asterie/ von Ph
5
Vnd dirzugab: vorhin entbrandten meine Sinnen
6
Vor Durst der Ewigkeyt/ als Ich den Neun Göttinnen
7
In jhren Armen lag/ jetzt bin ich/ meine Zier/
8
So weit von jhnen ab/ so nah ich bin bey dir/
9
Wie offt hab ich bißher gehoffet frey zu werden/
10
Wie offtmals hetten mich geführet von der Erden
11
Die Flügel der Vernunfft/ wann nicht das weite Meer
12
Der grossen Freundligkeit in dir gewesen wer?
13
Jedoch wird dich vnd mich Thalia nicht verschweigen/
14
Mein Augentrost/ ich geh’ ich geh’ jetz zu ersteigen
15
Der Ehren hohes Schloss: ob gleich der schnöde Neidt
16
Verwachen wird den Weg/ den Weg der Ewigkeit.
17
Der schnellen Jahren flucht/ so alles sonst kan tödten/
18
Hat nicht Gewalt in vns. Die trefflichen Poeten
19
Sein viel mehr/ als man meint: jhr hoher Sinn vnd Geist
20
Ist von deß Himmels Sitz in sie herab gereist.
21
Ein frey Gewissen auch ist gar nicht angebunden
22
An den Rumor deß Volcks/ so ehnlich ist den Hunden/
23
Sie bellen in die Lufft/ wo sie nicht können gehn/
24
Vnd bleiben doch alhier weit von dem Himmel stehn.
25
So bald vns Atropos den Faden abgeschnitten/
26
So balde haben wir auch vnser Recht erlitten:
27
Wann vnser Seel vnd Geist deß Leibes sind befreit/
28
Vnd lassen diese Welt/ so laßt vns auch der Neidt/
29
So ward auch Hercules/ der Kern der Helden/ jnne/
30
Daß niemand vor dem Todt/ die Mißgunst zäumen könne/
31
Diß ist der alte Lauff. Ich/ den du hier sichst stehn/
32
Vnd auch dein Lob mit mir/ soll nimmer vndergehn/
33
Es sey das mir hinfort für andern wird belieben
34
Was Aristoteles/ was Xenophon geschrieben/
35
Was Plato reich von List/ was Seneca gesagt/
36
Was Cato; oder auch/ es sey das mir behagt/
37
Ohn einigen Termin die Bücher aller Alten/
38
So durch deß Himmels gunst bißher sind vorbehalten/
39
Zu schliessen in mein Hertz; gleich wie ein mutig Pferdt/
40
Das sich an keinen Zaum/ an keine Schrancken kehrt.
41
Vnd kan nit stille stehn/ begierig fort zulauffen/
42
Es sey auch wie es will/ so werd ich von dem hauffen
43
Deß Pöbels sein getrennt/ mein Lieb/ mit dem bescheidt
44
Beger ich deiner Huld/ vnd gegenfreundtligkeit.
45
Gleich wie ein Tigerthier/ der Säuglinge beraubet/
46
Läufft grimmig hin vnd her/ es wütet/ tobet/ schnaubet/
47
Es heulet daß die Berg vnd aller Wald erschallt/
48
So schrey ich auch nach dir/ mein einig vssenthalt.
49
Ergib dich/ daß du nicht/ wann ich dir bin genommen
50
Dürffst sagen allererst: Ach möchstu wider kommen/
51
O Philomuse werth/ O edeler Verstandt/
52
Ich wolte zu der stundt dir bieten meine Handt/
53
Dir bieten meine Lieb/ vnd rechte wahre Trewe/
54
Dann wird vergeblich sein/ O Jungfraw/ deine Rewe/
55
Dann wird vergeblich sein dein Weinen/ Klag vnd Leidt/
56
Das Korn wächßt gar nit mehr/ ists einmal abgemeyt.
57
Wer wird hernach/ mein Lieb/ wer wirdt hernach dich preisen/
58
Wann diß mein jrrden Faß dann wirdt die Würme speisen?
59
Drumb komm/ O Schöne/ komm/ eh’ es zu langsam ist/
60
Komm/ laß vns gehn den Weg/ den ich mir außerkist.
61
Sich doch/ O du Syren/ du feindliche Freundinne/
62
Du freundliche Feindin/ in derer Huldt ich brinne/
63
Mein Port/ vff die allein ich wende mein Gesicht/
64
Mein Leben/ vnd mein Todt/ mein Schatten/ vnd mein Licht.
65
Sich doch Asterie/ die Meisterin der Zeiten
66
Das ewige Geschrey/ jhr Hand nach dir außbreiten.
67
Dieweil sie nun durch mich zu küssen dich begert/
68
Bin ich nit wid erumb auch deines Kusses werth?
