1
Vmb alles Gut vnd Gelt in diesem gantzen Lande
2
Sag ich noch euch/ Jungfraw/ noch andern was zu schande/
3
Vnd wolte Warlich nicht/ daß jemandt sprechen solt/
4
Ich wolt jhn nur auß Haß verkleinern vnverschuldt/
5
Ihr möget aber doch darneben künlich gleuben/
6
Daß ich ohn euch/ Gott lob/ wol werde leben bleiben/
7
Ich will derhalben auch mich nimmer vnderstehn/
8
Von wegen ewrer Huldt mit Lugen vmbzugehn/
9
Diß alles laß ich euch die Hoffeleuth erzeigen/
10
Die sonsten zimlich hoch mit reden können steigen/
11
Die jedes Wort auffziehen mit sonderlichem schein/
12
Auff daß sie desto mehr in ewrer Gnade sein.
13
Sie thun wol einen Eydt/ doch nicht ohn heimlich lachen/
14
Daß ewer äugelein die Sonne finster machen/
15
Vnd daß sie Sternen sein am hellen Firmament/
16
Von denen Frewd vnd Leyd zu jhnen wirdt gewendt/
17
Sie schwören hoch vnd thewr/ daß Gott euch außerlesen/
18
Vor aller Zierligkeit/ vor allem schönen Wesen/
19
Vnd sagen/ seelig sey das Jahr vnd denn die Zeit/
20
In der jhr grosse Zier der Welt geboren seit/
21
Sie sprechen wol darbey/ daß jhr durch bloß anblicken/
22
Auch ein Gemüt von Stein vermöget zu entzücken/
23
Daß auß America die beste Specerey
24
Mit ewrem Athem weit nicht zuvergleichen sey.
25
Daß schöner Hände nicht gemahlet werden künten/
26
Daß gegen jhnen Schnee zugleichen sey der Dinten/
27
Daß iedes Zänlin sey ein köstlicher Demant/
28
Das die Natur daran all jhre Kunst gewant.
29
Vnd daß die Lippen auch/ so als die Rosen blühen/
30
Weit sein den Edelsten Corallen vorzuziehen/
31
Das Haar (ich glaube nicht daß es von Hertzen kümpt)
32
Ein jeglicher vor Golt vnd beste Perlen nimpt.
33
Sie setzen wol hinzu/ wann sie euch reden hören/
34
Daß auch ein jedes Wort jhr Hertze thu versehren/
35
Vnd daß der starcke Mars durch ewre Liebligkeit
36
Die Waffen abzuthun euch würde sein bereit.
37
Geliebet euch hernach von Venus was zusingen/
38
Die Winde könnet jhr durch ewre Stimme zwingen/
39
Vnd wann jhr weiter auch euch zu der Lauten findt/
40
Ist Orpheus vngelehrt/ vnd gegen euch ein Kindt.
41
Wann jhr zu Felde kompt wohin man euch sicht gehen/
42
Da sicht man auch zugleich die schönsten Blumen stehen/
43
In summa/ die Natur hat diß an euch get han/
44
Daß ewre Treffligkeit kein Mensch beschreiben kan.
45
Wie möcht ich aber wol zuhören diesem allen/
46
Vnd auch vor Lachen nicht für meine Füsse fallen/
47
Ich glaube wer das Thun nur halb beschreiben wolt/
48
Er Feder vnd Papir auch schamroth machen solt.
49
Vnd was dann mich belangt/ bin ich gar nicht der Sinnen/
50
Daß ich so ewre Gunst verhoffte zugewinnen/
51
Mein Hertz ist auch noch nicht so trefflich sehr entzündt/
52
Daß ich jhm noch zur Zeit nicht widerstehen kündt.
53
Ich sage freylich wol/ vnd weiß es wahr zumachen/
54
Daß jhr gar rein vnd steiff bewahret ewre Sachen/
55
Vnd daß jhr sehr viel sein voll Hoffart/ stoltz vnd pracht/
56
Die jhr gar weißlich doch nicht sonders habt in acht.
57
Daß ich euch aber auch vor Göttlich solt erkennen/
58
Man möcht es/ förcht ich nur/ wol Träum vnd Lügen nennen/
59
In ewrem Leichnam lebt zwar alle Zierligkeit/
60
Doch auch nicht wenig ist dem Himmel trefflich weit.
